KORONADAL CITY- Nagpalasamat ang local government sang banwa sang Isulan, Sultan Kudarat kag ginkalipay naman sang mga himata sang mga biktima sa Isulan bombing makaligad nga mapatay sa operasyon ang ginkabi nga prime suspect sa asod-asod nga pagpamomba sa nasambit nga banwa.
Sa ekslusibo nga interbyu sang Bombo Radyo Koronadal kay 6ID Phil Army Spokesperson Capt. Arvin Encinas, ginkumpirmar sini nga napatay sang mgga myembro sang 601st Brigade ang notorious bomber sang Bangsamoro Islamic Freedom Fighters (BIFF) nga ginkilala kay Norodin Taib sa ginpatigayon nga operasyon kaina sang kaagahon sa Sitio Lab, Barangay Kuloy, Shariff Aguak, Maguindanao.
Suno kay Encinas, mga sibilyan ukon concerned citizen ang nag-report sa ginakuta-an kag ginapanaguan sang mga rebelde ang nasambit nga lugar rason nga nagresponder ang mga ini.
Pasulod na plang ang operating team sa lugar sang nagdaralagan na ang yara sa 5 ka tawo kun sa diin isa sa mga ini ang naghaboy sang granada rason agud nga magpalupok ang mga suldado.
Narekober naman ang isa ka Improvised Explosive Device, 2 improvised hand grenades, 3 cellphones kag mga subersibo nga dokumento.
Sa karon, padayon pa nga ginapangita sang mga otoridad ang mga nakapalagyo nga mga kaupdanan ni Taib.
