Gin-insister sang House prosecution panel nga may yara sila sang igo nga mga dokumento kag ebidensya agud mapamatud-an ang alegasyon sang unexplained wealth batok kay Vice President Sara Duterte.
Suno kay Lanao del Sur Rep. Zia Alonto Adiong, yara na sa kamot sang prosecution ang mga subpoenaed bank kag tax records ni Duterte kag sang iya bana, lakip ang financial records sang ila mga kompanya. Gamiton ini bilang ebidensya sa Article II sang impeachment trial.
Sa Article II, ginakaso si Duterte sang paglapas sa Konstitusyon kag pagtraidor sa pagsalig sang publiko bangud sa alegasyon nga may yara siya sang manggad nga indi nagakatupong sa iya legal nga kita, indi kompleto nga pagdeklara sang mga properties kag interes sa negosyo samtang yara sa serbisyo publiko.
Wala anay ginbuyagyag ni Adiong ang detalye sang ila mga ebidensya, apang ginpahayag niya nga dapat ini hulaton sang publiko sa tion nga ipresentar na ang mga ebidensya sa Senate Impeachment Court.
Samtang, ginakumpleto na sang prosecution ang presentasyon sang mga ebidensya para sa Article I nga may kaangtanan sa alegasyon sang maanomalya nga paggamit sang P612.5 milyon nga confidential funds sang Office of the Vice President kag Department of Education.
Ginatan-aw man sang House prosecution panel ang posibilidad nga laktawan ang Article III ukon ang alegasyon sang bribery sa mga opisyal sang DepEd agud mapamubo ang impeachment trial kag mas madasig nga makapadayon sa Article II.
Apang tubtob subong, wala pa sang pinal nga desisyon ang prosecution nahanungod sini.
Suno kay Adiong, ginakonsiderar sang panel ang tion nga magamit sa pagpresentar sang mga testigo kag testimonya, bangud ginatapos na nila ang Article I kag magaabante na sa Article II ukon ang alegasyon sang unexplained wealth.
