KORONADAL CITY – Nagapabilin subong sa nagkalain-lain nga evacuation center ang yara sa halos 1,500 ka indibidwal ukon 400 ka pamilya bangud sa pagpangharass kag pag-atake sang Bangsamoro Islamic Freedom Fighters (BIFF) sa banwa sang Pigcawayan, North Cotabato.
Suno kay Pigcawayan LGU spokesperson Jezler Garcesa, 145 ka pamilya ukon 569 indibidwal ang nagikan sa Malagakit, 41 pamilya ukon 61 indibidwal ang nagikan sa Simsiman, samtang yara naman sa 22 ka pamilya ukon 95 ka mga indibidwal ang nagbakwit sa Banucagon kag may 25 indibidwal sa Brgy. Panatan.
Ang nasambit nga mga evacuees ang nagapabilin sa Central Panatan Brgy Hall evacuation center, Bulucaon Covered Court evacuation center kag Municipal Hall sang Pigcawayan, North Cotabato.
Ginpasiguro man sang LGU-Pigcawayan nga may nakatutok nga medical team sa mga nagbakwit agud nga malikawan nga magbalatian ang mga ini kag nagpanghatag sang food packs para sa mga ini.
Kadungan sini, gindihon ang Task force Tutok sang Police Regional Office 12 nga amo ang magaimbestigar sa natabo.
Ginpahayag ni P/Supt Romeo Galgo sa Police Regional Office nga kadungan sang pagdihon sang nasambit nga task group ang ginapatuman nga full alert status sa nasambit nga banwa.
Ini makaligad nga ginpasiguro sang 6Th ID Philippine Army nga narescue na ang 21 ka mga hostage sang BIFF sa ila nga pagbulig sa MILF ground commanders.
Nahibaluan nga sa subong nagapadayon ang clearing operation sa lugar kag mga kaiping nga banwa sa Pigcawayan.
Madumduman nga 2 ka mga CAFGU ang napilasan sa nasambit nga engkwentro samtang 8 naman ang patay sa bahin sang BIFF nga ginpanginwala sang mga rebelde.
