Nakabaton sang pinansyal kag iban pa nga bulig ang walo ka pamilya nga nasunugan sang panimalay sa Purok New Leganes, Barangay Zone 1, Koronadal City.
Sa interview sang Bombo Radyo Koronadal kay Koronadal City Mayor Erlinda Araquil, iya ginpahayag nga personal nga nagpadulong siya sa lugar agud maghatag sang food packs kag pinansyal nga bulig sa mga apektado nga pamilya.
Samtang, yara sa evacuation center ang 8 tubtob 10 ka pamilya ukon 29 ka indibidwal nga direkta nga naapektuhan sang sunog.
Ginagamit bilang temporaryo nga evacuation center ang Barangay Zone 1 Gymnasium.
Suno sa mga opisyal sang barangay, gilayon nga ginbakwit ang mga pamilya matapos ang insidente.
Duha ka indibidwal ang nakaagom sang minor injuries kag ginhatagan gilayon sang pauna nga medikal nga bulig sang rescue team.
Padayon man ang City Social Welfare and Development Office sa paghatag sang hot meals kag emergency food packs sa mga evacuees.
Nagapadayon ang mga ahensya sang syudad sa paghatag sang kinahanglanon nga bulig sa mga pamilya samtang yara sila sa evacuation center.
