Arestado ang isa ka drug suspect matapos nagtangka nga magpalagyo kag nadakpan sa buybust operation sa Cannery Housing, Brgy. Poblacion, Polomolok, South Cotabato.
Ginkilala ang suspek nga si alyas John, 28, mekaniko, kag residente sang Brgy. Dadiangas North, General Santos City.
Suno sa Polomolok PNP, nagsugod ang transaksyon sa Phoenix Gas Station apang nahibal-an sang suspek nga pulis ang kaupod niya nga nagtransaksyon gani nagpalagyo siya gamit ang puti nga Chevrolet Trailblazer.
Nadamage ang sasakyan sa pagkabangga sa concrete barrier kag tricycle, kag amo ini ang nagdala sa pagkadakop sa suspek.
Narekober gikan sa iya ang 38 gramos sang shabu, P1,000 nga buybust money, kag ang nasambit nga salakyan.
Maga-atubang ang suspek sang kaso nga paglapas sa RA 9165.
Ginpahayag naman sang Polomolok PNP nga lehitimo nga buybust operation ini kag indi road rage.
