KORONADAL CITY- Madamo suno pa nga mga kongresista nga nagapamalabag sa liwat nga pagbuhi sa pamatbat nga kamatayon ang nakumbinsir nga magpabor diri matapos nga gikan sa 21 offence, 1 ka offence na lamang ang mahimo pamatbatan sang kamatayon.
Ini ang ginpahayag ni South Cotabato 2nd District Rep. at Deputy Speaker for Mindanao Ferdinand Hernandez kasunod sang pagkapasar sang death penalty bill sa 2nd reading sa kamara kun sa diin isa ini sa mga nagpabor.
Ginpahayag sang kongresista nga gikan sa 21 offence, kalakip pa ang mandatory death penalty nagresulta na lamang sa 1 offence ang magapangatubang sa death penalty kag nakakas naman ang mandatory death penalty sa serye sang caucus discussion nga ginpatigayon sang majority nga nagresulta sa pagkapasar sini sa 2nd reading sa kamara.
Suno kay Hernandez, ang drug related cases na lamang ang mahimo pamatbatan sang kamatayon apang ang husgado na su no pa ang mahimo magdesisyon kun ang suspek ang pamatbatan sang kamatayon ukon reclusion perpetua ukon life imprisonment.
Kag kun death penalty naman ang ipamatbat diri, magapaidalom pa ini review sang Supreme Court.
Nahibaluan nga base sa pahayag sang opisyal, yara sa 95% sang mga kongresista sa Mindanao ang nagpabor sa nasambit nga hagna kag lauman suno pa ang positibo nga resulta sa ginaduso sang Duterte Administration nga liwat nga pagbuhi sa pamatbat nga kamatayon.
