Ginapahinumduman sang Department of Labor and Employment (DOLE) ang mga private companies sa ila nga obligasyon nga maghatag sang mandatory 13th-month pay sa ila mga empleyado.
Suno kay Labor Secretary Bienvenido Laguesma, obligado ang mga kumbuyuhan nga maghatag sang 13th-month pay saila mga empleyado, sa idalom sang balaod.
Ginhingyo man ni Laguesma sa mga employer nga agahan ang paghatag sang 13th month pay agud maka-budget sang maayo ang mga empleyado kag mabakal ang ila gusto nga baklon.
Suno kay Laguesma, ang mas aga nga disbursement ang ginpasiguro nga magabenepisyo sa mga mamumugon, labi na nagapadayon ang pagasaka sang presyo sang mga balaklon.
Samtang, liwat man ginpagwas ang guidelines sang DOLE para sa insakto nga kompyutasyon para sa 13th-month pay.
Sa idalom sang balaod, ang mga rank-and-file employees sa private sector, bisan ano nga posisyon, designation, ukon employment status, kag bisan ano pa nga ila pamaagi sa pag-employ, ang dapat makadawat sang 13-th month pay, kun ang mga ini nagaubra na sang isa ka bulan.
Magin ang mga rank-and-file employees nga ginaswelduhan pamaagi sang piece-rate basis, fixed ukon guaranteed wage – plus commission, ukon may mga multiple employers, mga una na nag resign, mga na-terminate halin sa ubra ukon yara sa maternity leave, ang kinanglan makadawat man sini.
