Dole-12 may tanyag nga bulig para sa mga empleyado nga apektado sang company closures tuga sang covid-19.

KORONADAL CITY – Madamo nga mga kumbyohan sa bug-os nga rehiyon 12 ang apektado tuga sa covid-19 rason nga kadam-an sa mga ini ang nagsirado sang temporaryo ukon permanente na.
Sa interbyu sang Bombo Radyo Koronadal kay Ruby Carasco, ang chief sang technical services division sang DOLE-12, ginpakigbahin sini ang mga datos sang mga apektado nga mga kumbyohan nga nagsirado sang temporaryo, permanente kag nagbuhin sang ila mga trabahante kag ang mga naapektohan man nga mga empleyado.
Sandig sa ila datos, sa bug-os nga rehiyon yara sa 629 ka mga establishmyento ang nagapatuman sang flexible work arrangement kun sa diin apektado ang 14, 097 ka mga empleyado.
Yara naman sa 1,674 ka mga establishmyento ang temporaryo nga nagsirado ukon 19, 526 ka trabahante ang apektado diri.
Samtang ang mga establishmyento nga nagbuhin sang ila mga empleyado agud mapabilin lamang ang operasyon sini ang yara sa 148 ka kumbyohan kun sa diin 1, 612 ka mga trabahante ang naapektohan.
Yara naman sa 17, 324 ka mga mamumugon ang naapektohan makaligad permanente nga nagsirado ang pila pa ka mga talatapan sa bug-os nga rehiyon.