Mariing itinanggi ng Department of Health (DOH) ang mga alegasyong sangkot sa pagsusugal si Health Secretary Jose “Brix” Pujalte Jr., kasunod ng pagkalat ng isang sulat na nag-uugnay sa kanya sa madalas na pananatili umano sa casino.
Ayon sa DOH, walang katotohanan ang naturang alegasyon at walang basehan ang mga impormasyong kumakalat laban sa kalihim.
Nauna nang ipinaliwanag ni Pujalte na ang kanyang pananatili sa isang hotel noong Hulyo 20 ay bahagi ng kanyang opisyal na tungkulin. Aniya, dumalo siya sa isang pagpupulong kasama ang ilang opisyal mula sa Masbate at Sorsogon upang talakayin ang mga hakbang para sa karagdagang suporta sa mga pampublikong ospital sa mga naturang lalawigan.
Sa kabila ng kontrobersiya, tiniyak ng DOH na nananatiling nakatuon ang kagawaran sa paghahatid ng de-kalidad na serbisyong pangkalusugan at hindi maaapektuhan ng isyu ang kanilang mga programa para sa publiko.
Matatandaang itinalaga ni Pangulong Ferdinand Marcos Jr. si Pujalte bilang kalihim ng DOH noong Hulyo 13, kasunod ng pagbibitiw sa puwesto ni dating Health Secretary Dr. Ted Herbosa.
