Indi mapungan sang Commission on Elections (Comelec) ang pagpalapta sang “promotional materials” sang pila ka mga personalidad bangud ginakabig pa lamang ang mga ini nga aspirants kag indi pa kandidato para sa piniliay sini nga tuig.
Suno kay Comelec Chairman George Erwin Garcia, nasubuan man ang Comelec, apang wala ang mga ini sang mahimo kundi magsunod sa kasuguan kag sa desisyon sang Korte Suprema.
Masakit man nga sila ang ginabasul sang pumuluyo sa paglapta sang mga nawong sang mga aspirants, apang wala sang mahimo diri ang Comelec suno pa kay Garcia.//Nahibaluan nga sandig sa ruling sang Korte Suprema, indi makapasaka sang kaso ukon makapangkakas sang promotional materials ang Comelec samtang wala pa nagasugod ang campaign period.
Magasugod ang election period sa Enero 12, samtang ang campaign period para sa mga senatorial candidates kag partylist groups ang magasugod pa sa Pebrero 11.
Natalana naman ipagwa sang Comelec sini nga Domingo, Enero 5, ang penal nga listahan sang mga kandidato para sa Mayo 12 nga midterm elections.
