Indi magnubo sa apat ka kaiping nga mga kapungsuran sang Pilipinas ang nagpromisa nga magapadala sila sang air assets agud nga suportaran ang relief kag aid operations sang Pilipinas sa mga lugar nga gin-igo sang Severe Tropical Storm Kristine nga may international name nga Trami.
Ini ang ginpahibalo ni Office of Civil Defense (OCD) Administrator kag Undersecretary Ariel Nepomuceno.
Dugang pa ni Nepomuceno, nagpasalig ang apat ka mga pungsod nga magapahulam sila sang C-130 aircraft, dalagko nga choppers, kag iban pa nga air assets agud nga mabuligan ang Pilipinas sa pagdul-ong sang mga relief supplies sa mga komunidad nga apektado sang bagyo Kristine.
Suno sa OCD official, may nagakaigo nga air assets ang Pilipinas apang abi-abihon sang gobyerno ang ano man nga dugang nga bulig gikan sa iban nga mga pungsod.
Ginpahibalo man ni Nepomuceno nga magluwas sa apat ka Southeast Asian neighbors, nagpabutyag man ang Taiwan sang ila intensyon nga magpadala sang aircraft agud nga suportaran ang relief operation sang Pilipinas.
