KORONADAL CITY – Pormal na nga ginpaidalom sa state of calamity ang Barangay Namnama, Koronadal City makaligad ang pagpanalasa sang buhawi nga dala sang mabaskog nga pagbubo sang ulan.
Ini ang ginkumpirmar ni Barangay Chairman Alfredo Sotelo sang Barangay Namnama.
Suno kay Sotelo, nagdesisyon ang barangay council nga igapaidalom sa state of calamity ang ila nga barangay makaligad nga naglab-ot na sa 4 ka mga Purok ang apektado sang kalamidad nga ginlakipan sang mga Purok Saranay, Nagkakaisa, Ferry kag Magsaysay.
Sa nasambit nga mga lugar, 16 ka mga puluy-an ang naguba sang buhawi kun diin 2 sa mga ini ang totally damage samtang naglab-ot naman sa masobra 20 ka ektarya sang pananum ang apektado sang kalamidad.
Bangud sa sobra kabaskog nga hangin, pila samga puluy-an ang natumbahan sang mga puno kag masuwerte lamang nga wala sang may napilasan nga mga residente.
Kaangot sini, magahatag sang bulig pinansyal sa mga apektado nga pamilya ang barangay council.
Nahibaluan nga nagpanghatag sang family food packs ang city government sa mga apektado nga pamilya.
Magluwas sa mga ini, magahatag man sang cash assistance ang City Social Welfare and Development Office sa mga biktima.
Sa subong, padayon pa nga ginahibalo ang kabug-usan nga damyos nga ginbilin sang natabo nga kalamidad.
