KORONADAL CITY – Gin-athag ni Lt. Col. Harold Cabunoc, commanding officer sang 33rd Infantry Batallion (IB) Philippine Army nga ang natabo nga nilukpanay sa Barangay Midpandakan, General Salipada SK Pendaton, Maguindanao sa tunga sang grupo sang Bangsamoro Islamic Freedom Fighters (BIFF) kag Moro Islamic Liberation Front (MILF) kasunod sang natabo nga away sa tunga sang duha ka pamilya nga may madugay na nga wala paghangpanay bangud sa duta.
Sa interbyu sang Bombo Radyo Koronadal kay Lt. Col. Cabunoc, nalakip lamang sa engkwentro ang iban nga mga myembro sang BIFF kag MILF bangud sa ang duha ka magkaaway nga pamilya ang naghingyo sang bulig saila mga himata nga katapu sang nasambit nga mga grupo.
Tubtob kaina sang aga, nakaangkon sang kambyuhanay snag lupok ang mga ini nga nagtuga na sang kahadlok sa mga residete sa lugar.
Sa subong, wala anay ginapahanugutan ang mga residente nga magsulod sa Barangay Midpandakan agud nga masiguro ang kaluwasan sang mga residente.
Nahibaluan nga nagaangkon sang tagsa-tagsa nila ka mga teritoryo ang pamilya Agi kag Tumapil sa nasambit nga lugar.
Nagsugod suno pa ang away sang nagligad nga adlaw makaligad nga ginbalabagan sang himata sang isa ka barangay Kapitan ang salakyan sang kaaway sini nga pamilya kag ginkuha ang kagamitan rason nga nagkinagamo.
Nagalaum naman si Cabunoc nga mag-unatat na ang kambyuhanay sang lupok bangud indi pa mahimo nga makabalik sa normal nga kabuhi ang mga residente sa tion nga magpadayon ini.
