Intensiyonal nga ginbungguan kag ginbalabagan sang barko sang Chinese Coast Guard ang barko sang Philippine Coast Guard (PCG) samtang nagapatigayon sang medical evacuation para sa nagamasakit nga mi0yembro sang Philippine Navy nga naga-station sa BRP Sierra Madre sa Ayungin shoal.
Ini ang base sa video sang PCG nga ginpaguwa kun diin ginpahayag ni PCG spokesperson for the West Philippine Sea Commodore Jay Tarriela nga wala nila ini ginatolerar.
Dugang pa sang opisyal sang PCG nga isa ka barbaric kag indi tawhanon nga aksyon ang ginhimo sang Chinese Coast Guard kag wala ini sang lugar sa pungsod.
Ang simple lamang kuntani nga medical evacuation operation ang gin-harass pa sang mga ini.
Dako man ang ila pagkadismaya bangud ginpahibalo sang Philippine Coast Guard sa barko sang China paagi sa radio kag public address system nga isa ka humanitarian ang katuyuan sang ila misyon para sa medical evacuation apang wala sila ginpamatian.
Bangud sini, hugot nila ini nga ginakundenar kag nagapanawagan sa pungsod nga mag-aksiyon batuk sa indi makatarungan nga ginhimo sang mga ini.
