Padayon nga ginabantayan sang mga awtoridad ang Bagyong Dolphin nga yara sa guwa sang Philippine Area of Responsibility (PAR) apang malapit sa aminhan nga bahin sang Pilipinas.
Nakit-an ang bagyo mga 825 kilometro sa naaminhan-sidlangan sang extreme Northern Luzon.
May kusog ini nga 150 km/h nga maximum sustained winds malapit sa sentro kag pagbugso nga nagaabot sa 185 km/h, samtang nagahulag pakadto sa west-southwest sa kadasigon nga 15 km/h.
Bisan yara sa guwa sang PAR, ginapaabot nga magapadayon ang epekto sini paagi sa pagpabakod sang Habagat, nga nagadala sang mabaskog nga ulan sa madamo nga bahin sang Luzon kag Visayas.
Ginalaygayan ang mga residente, labi na ang yara sa manubo nga lugar, nga mag-andam sa posible nga baha kag landslide.
Samtang, may isa pa ka tropical cyclone nga ginabantayan sang state weather bureau nga yara mga 3,055 kilometro sa sidlangan sang extreme Northern Luzon.
May kusog ini nga 45 km/h nga hangin kag pagbugso nga 55 km/h, kag nagahulag pakadto sa sidlangan sa kadasigon nga 50 km/h.
Bisan malayo pa ini sa teritoryo sang Pilipinas, padayon ini nga ginamonitor bangud mahimo ini makaapekto sa kahimtangan sang panahon sa masunod nga mga adlaw.
