Ginpakigbahin sang archery gold medalist nga si Keisha Louise Trinidad Estrabon ang iya eksperyensya matapos ang iya madinalag-on nga kampanya sa Palarong Pambansa 2026.
Ginpahayag ni Estrabon nga puno sang preparasyon kag determinasyon ang ila pagpadulong sa Agusan del Sur, kag daku ang kalipay nga iya nabatyagan sang makabaton sang bulawan nga medalya sa archery.
Ini ang iya ikaduha nga pagsali sa Palarong Pambansa. Sang nagligad nga tuig, nagtapos siya sa ika-30 nga puwesto bangud sang problema sa kagamitan, apang subong nga tuig nakabawi siya kag nakasungkit sang gold medal.
Sa sulod sang anum ka tuig, padayon nga ginpangabudlayan ni Estrabon ang archery halin sang Grade 2 pa lamang siya kag nagaedad sang walo ukon siyam ka tuig.
Suno sa iya, ang padayon nga ensayo kag dedikasyon amo ang nagtuga sang iya kadalag-an subong.
Bisan nakakuha na sang pinakataas nga kadungganan, wala pa nagatapos ang iya mga plano.
Ginpahayag niya nga padayon siya nga mag-ensayo agud mas mapauswag pa ang iya kahimtangan kag makalab-ot sa iya handum nga makasulod sa national team sang Pilipinas.
Ginhatagan man niya sang pagkilala ang iya pamilya kag mga abyan nga nagapadayon sa pagsuporta sa iya sports career.
Bilang isa ka 15-anyos nga estudyante sang Dolores Tenesa Montessori Academy Incorporated, ginpahayag niya nga ginabalanse niya ang pag-eskwela kag pag-ensayo pinaagi sa maayo nga pagdumala sang oras.
Sa iya mensahe para sa mga kabataan nga gusto magsulod sa archery ukon bisan ano nga sport, gin-agda niya sila nga indi hinamambog kon mangin mapirde.
Suno kay Estrabon, ang kapierdehan indi katapusan kundi isa lamang ka bahin sang pagtuon kag pag-uswag bilang atleta.
Isa man sa pinakadaku nga iya naangkon nga kadungganan amo ang paglapas sa record sa 70-meter distance event. Ginbungkag niya ang nagligad nga marka nga 316 points nga gin-angkon sang atleta halin sa Paraa Region matapos siya makapuntos sang 318 points, gani ginakilala siya subong bilang isa ka new record breaker sa nasambit nga kategorya.
