Nagsungka na sa National Bureau of Investigation (NBI) si Felicito Cristobal Guevarra, presidente sang Samchan Foreign Exchange Corp. kag isa sa mga akusado sa kaso nga may kaangtanan sa ginapatihan nga kickbacks sa mga proyekto sang gobyerno nga nadalahig si anay House Speaker Martin Romualdez.
Suno sa NBI, malinong nga nagsungka si Guevarra sa Forbes Park, Makati City, matapos ang koordinasyon sang iya abogado kag mga imbestigador.
Ginsugata siya sang NBI sa Santuario de San Antonio Parish sa McKinley Road sang Nobyembre 19, kag ginserbihan sang warrant of arrest nga ginpagwa sang Third Division sang Sandiganbayan para sa kasong plunder.
Ang kaso may kaangtanan sa ginapatihan nga ₱7.44 bilyon nga kickbacks nga nalakip sa national budget halin 2022 tubtob 2025.
Sang masunod nga adlaw, personal nga ginpresentar sang NBI si Guevarra sa Sandiganbayan kag ginsumiter ang return of warrant of arrest.
Samtang, ginhatagan siya sang Office of the Ombudsman sang conditional immunity suno sa Section 17 sang Republic Act 6770 ukon Ombudsman Act of 1989.
Suno sa Ombudsman, importante ang iya testimonya kag mga rekord bilang presidente sang Samchan agud masundan ang pagdalagan sang kwarta kag mabuligan ang prosecution sa paghibalo sang kamatuoran sa kaso.
Nahibaluan man nga ginbalik na sang Samchan sa Bureau of the Treasury ang tanan nga kinitaan sini halin sa ginakuwestiyon nga mga transaksyon.
Padayon naman nga ginahulat ang pag-uswag sang mga proseso sa korte batok sa mga akusado sa amo nga kaso.













