Nag-atubang sa problema sa immigration ang anay world boxing champion nga si Jorge Linares matapos siya dakpon sang mga opisyal sang US Immigration and Customs Enforcement (ICE) sa El Paso International Airport sa Texas.
Sandig sa kumpirmasyon sang ICE, gin-arestar ang anay Venezuelan boxing champion bangud ginatudlo nga nagpabilin siya sa Estados Unidos bisan naglapaw na sa ginpahanugutan nga tion sang iya temporary stay permit.
Nagsulod siya sa nasambit nga pungsod sang Oktubre 26, 2023, kag subong yara sa kustodiya samtang nagapadayon ang proseso nga may kaangtanan sa iya posible nga deportation.
Apang ginpahayag sang legal team ni Linares nga may balido siya nga permiso agud mag-estar sa Estados Unidos.
Ginpasiguro man sang iya mga abogado nga nagakooperar siya sa mga awtoridad agud masulbar ang nagatuhaw nga isyu.
Nagpabutyag man sang suporta si World Boxing Association (WBA) President Gilberto J. Mendoza para sa anay kampeon.
Suno sa iya, padayon ang iya komunikasyon sa pamilya ni Linares sa tunga sang sitwasyon.
Madumduman nga gin-anunsyo ni Linares ang iya pagretiro sa professional boxing sang 2023 matapos ang sobra duha ka dekada nga karera.
Sa iya madinalag-on nga kampanya, nangin world champion siya sa featherweight, super featherweight kag lightweight divisions.
Sa karon, nagapadayon ang legal nga proseso nga nagasentro sa iya immigration status sa Estados Unidos.









