-- ADVERTISEMENT --

Ginpasalig sang Department of Health (DOH)-SOCCSKSARGEN nga may yara sang libre nga serbisyo sa pagbata sa mga pampubliko nga ospital kag accredited lying-in facilities agud mabuligan ang mga pamilya nga may limitado nga pinansyal nga ikasarang.

Sa interview sang Bombo Radyo Koronadal ginpahayag ni Nurse Cindy Estrebon, nga ang polisiya nga “No Balance Billing” (NBB) ang nagasakop sang pagpabata sa kwalipikado nga mga pasilidad, lakip na ang Provincial Hospital kag selected nga mga lying-in centers.

Mahimo man magdangop ang mga pamilya nga nagakinahanglan sa Social Welfare and Development Office kag iban pa nga mga ahensya para sa pinansyal nga bulig, nga mahimo maglakip sang coverage para sa mga gasto sa paglubong sa tion sang pagtaliwan sang isa ka lapsag.

Magluwas sa insidente nga nagluntad sa Barangay Rotonda, Syudad sang Koronadal ginhatagan pagtamod ang importansya sang pagbun-ag sa sulod sang mga pasilidad sa ikaayong lawas (pareho sang ospital ukon birthing home) ang pinakaluwas nga pamaagi agud maprotektahan ang kabuhi sang iloy kag sang lapsag.

Gani, gin-engganyo ni Estrebon ang mga nagabusong nga likawan ang pagpili sang pagpabata sa balay bangud lamang sa kakulang sang pundo; sa baylo, dapat nila pahimuslan ang libre nga serbisyo medikal kag pinansyal nga bulig nga may ara sang nagkalain-lain nga pinansyal nga bulig (medical financial assistance) nga matigayon sa mga pampubliko nga ospital kag pasilidad sa ikaayong lawas diri sa Pilipinas, ilabi na sa probinsya sang South Cotabato kag siyudad sang Koronadal.