Patay ang isa ka school principal matapos gintiro sang wala makilala nga mga suspetsado sa Barangay Salbu, Datu Saudi Ampatuan, Maguindanao del Sur, takna alas 8:15 sang aga sang Miyerkules, Nobyembre 18, 2026.
Ginkilala sang Police Regional Office-Bangsamoro Autonomous Region (PRO-BAR) ang biktima nga si Dionel Villabito Mahusay, principal sang Pendililang Elementary School kag residente sang nasambit nga barangay.
Base sa inisyal nga imbestigasyon, ginamaneho sang biktima ang iya minivan matapos maghalin sa ila puluy-an sang ginpalapitan sang mga armado nga mga suspek kag gintad-tad sang bala ang salakyan, nga ginabanta 50 metros halin sa iya gina-istaran sang natabo ang insidente.
Nag-angkon sang igo sang bala sa nagkalain-lain nga bahin sang lawas ang biktima nga nagresulta sa iya gilayon nga kamatayon.
Nagapakita ang mga report nga ang mga imbestigador wala sing narekober nga bisan ano nga empty shell casings sa lugar.
Ginpakamalaut sang mga opisyal sang Ministry of Basic, Higher and Technical Education (MBHTE) ang pagpatay kag ginhatagan pagtamod ang importansya sang pagsiguro sang kaluwasan sang mga manunudlo kag mga tinawo sang buluthuan.
Padayon naman ang imbestigasyon sang kapulisan agud matumod ang mga naghimo sang krimen kag ang motibo sa krimen.
Wala pa sang kumpirmado nga impormasyon kon bala may kaangtanan sa propesyon ukon trabaho sang biktima ang pagpangluthang.













