-- ADVERTISEMENT --

Nagapadayon ang panawagan sang mga hog raisers sa Esperanza, Sultan Kudarat kag Tupi, South Cotabato para sa mas mataas nga presyo sang buhi nga baboy bangud sa nubo nga farmgate price kag mataas nga production costs.

Sa interview sang Bombo Radyo Koronadal, ginpahayag ni Rosa Mae Taliga Edjan, Vice President sang Esperanza Livestock Growers Association, nga ginapangayo nila ang P140 tubtob P150 kada kilo halin sa kasamtangan nga P115 kada kilo. Suno sa iya, nagalab-ot na sa P4,000 tubtob P5,000 ang kalugian sa kada baboy bangud sa mahal nga feeds kag iban pa nga mga galastuhon.

Bangud sini, nagapanawagan sila kay Governor Datu Pax Ali S. Mangudadatu kag Board Member Maria Loida D. De Manuel nga hatagan sang aksyon ang ila panawagan.

Indi lamang sa Esperanza nagaatubang sang amo nga problema bangud pareho man nga panawagan ang ginapalab-ot sang mga hog raisers sa Tupi, South Cotabato, kun sa diin ginapangayo nila ang P160 kada kilo nga buying price halin sa kasamtangan nga P120 tubtob P140.

Suno kay Arthur Jaurigue, lider sang Tupi Hog Raisers Association, ginabanta nga 700 tubtob 2,000 ka hog raisers ang apektado sa ila banwa. Nagpabutyag man siya sang pagkadismaya sa sabat ni Mayor Romeo Tamayo sa ila signature campaign, matapos nga suno pa sa alkalde, yara sa nasyonal nga gobyerno ang awtoridad sa pagsolbar sang problema sa presyo.

Bilang pagpadayon sang ila panawagan, nagpatigayon sang protesta ang mga hog raisers sa Tupi agud liwat nga ipalab-ot sa gobyerno ang ila mga reklamo.

Bisan nagalain ang presyo nga ginapangayo sang duha ka grupo, nagaisa ang ila panawagan para sa gilayon nga aksyon agud masiguro ang makatarunganon nga presyo sang buhi nga baboy kag malikawan ang padayon nga pagkalugi sang lokal nga industriya sang pag-alima sang baboy.

Samtang, bukas naman ang Bombo Radyo Koronadal sa bahin nanday Sultan Kudarat Governor Datu Pax Ali S. Mangudadatu, Board Member Maria Loida D. Manuel, kag Mayor Romeo Tamayo.