-- ADVERTISEMENT --

Nagtuga sang kahadlok sa mga pasahero ang pagbungguanay sang duha ka pampasahero nga tren malapit sa panguna nga estasyon sang tren sa Prague, Czech Republic, nga nagresulta sa 46 ka pilason.

Nagluntad ang insidente pasado alas-7:00 sang aga, diin lakip sa mga nag-angkon sang malubha nga pilas ang duha ka drayber sang tren. Bisan pa sini, wala sang napagkit nga napatay sa insidente.

Gilayon nga nagresponde ang mga rescue personnel kag emergency responders agud luwason ang mga pasahero, maghatag sang first aid kag dal-on sa ospital ang mga nagkinahanglan sang dugang nga pagbulong.

Ginpahayag nga nagdugay sang halos duha ka oras ang rescue operation antes nakompleto ang pagpagwa sa tanan nga pasahero halin sa duha ka tren.

Lakip sa mga gindala sa ospital ang 16 ka foreign nationals.

Suno sa kapulisan, natapos na ang operasyon sa pagluwas kag nagasugod na ang masangkad nga imbestigasyon agud mahibaluan ang eksakto nga rason sang aksidente.

Bangud sa insidente, temporaryo man nga nadisturbo ang biyahe sang iban nga mga tren pakadto kag paguwa sa kapital.

Kaangot sini, ginlaygayan sang mga otoridad ang mga pasahero nga maggamit anay sang alternatibo nga mga ruta samtang nagapadayon ang imbestigasyon.