-- ADVERTISEMENT --

Nagdesisyon nga magbiya sa iya posisyon si Mongolian President Ukhnaa Khurelsukh matapos mag-atubang sang mga akusasyon sang korapsyon kag panawagan nga ipa-impeach siya sa Parlamento.

Nagsugod ang kontrobersiya matapos magpagwa sang pahayag ang oposisyon nga Democratic Party nga nag-akusar kay Khurelsukh nga naulamid sa graft.

Ginpanawagan man sang grupo nga mag-resign siya ukon atubangon ang impeachment proceedings.

Sa pihak sang mga alegasyon, ginpamatud-an sang presidente nga wala sang kamatuoran ang mga akusasyon batok sa iya.

Suno sa iya, mas maayo nga magbiya anay siya sa puwesto agud mahatagan sang tion nga mahibaluan ang kamatuoran kag matinluan ang iya ngalan.

Sa iya opisyal nga statement, ginpahayag ni Khurelsukh nga i-refer niya sa nagakaigo nga mga awtoridad ang mga tawo nga nagguba sa iya reputasyon kag mangita sang paagi agud mabalik ang iya dungog.

Natabo ang iya pagbiya sa tunga sang nagadamo nga tensyon sa politika sa Mongolia, lakip na ang mga indi pag-uyon sa sulod sang nagadumala nga Mongolian People’s Party (MPP).

Sang nagligad nga mga bulan, nagpatigayon man sang mga protesta ang mga kabataan sa kapital nga Ulaanbaatar agud ipabutyag ang ila pagkadismaya sa mga elite kag sa ginapatihan nila nga malapnag nga kakulangon sang hustisya sa pungsod.

Suno sa report, ginalauman nga si Parliament Speaker Sandag Byambatsogt sang MPP ang temporaryo nga magabulos sa posisyon bilang presidente sa sulod sang apat ka bulan samtang ginapreparar ang masunod nga presidential elections.