-- ADVERTISEMENT --

Ginalauman nga magahatag sang mas madasig nga pagresponde sa mga kalamidad, dugang nga seguridad kag mas madamo nga pamuhunan sa Pilipinas ang bag-o nga kasugtanan sa depensa sang Pilipinas kag Australia.

Suno kay Department of National Defense Secretary Gilberto Teodoro Jr., kabahin sa panguna nga katuyuan sang Defence Cooperation Arrangement (DCA) ang pagpahapos sang mga proseso sa idalom sang Status of Visiting Forces Agreement agud mapadasig ang pagpatigayon sang tingob nga mga hilikuton militar.

Dugang pa niya, tatlo ka importante nga benepisyo ang ginalauman sang gobyerno, lakip ang mas madasig nga paghatag sang bulig sa mga lugar nga maapektuhan sang kalamidad, pagpabakod sang pagsalig sang mga manugpuhunan kag pagpalig-on sang seguridad sang pungsod.

Ginpahayag man ni Teodoro nga importante ang kalig-on kag seguridad sa West Philippine Sea agud masiguro ang malawig nga pag-uswag sang ekonomiya kag mapabakod ang pagsalig sang mga lokal kag langyaw nga manugpuhunan.

Gindugang niya nga ang mas mabakod nga kooperasyon sa depensa magabulig man sa Pilipinas nga mangin mas preparado sa nagkalainlain nga pangkalibutanon nga hitabo nga mahimo makaapekto sa presyo sang mga balaklon.

Madumduman nga ginpirmahan sang Pilipinas kag Australia ang DCA sang Nobyembre 15, nga ginpangunahan nanday Teodoro kag Australian Ambassador to the Philippines Marc Innes-Brown, sa presensya ni Australian Prime Minister Anthony Albanese.