Nagpanawagan si Kagawad Bobby Castillo halin sa Barangay Concepcion sa syudad sang Koronadal sa mga tag-iya sang boarding house nga siguraduhon nga ila makolekta kag ma-verify ang personal nga impormasyon sang ila mga tenant, bangud ini ang makabulig sa pagmentinar sang seguridad sa sulod sang komunidad.
Kasunod ini sang pagkapatay sang isa ka lalaki—nga ginapangita sa kaso nga murder—matapos ang gin-alegar pagbayluhanay sang lupok sa ginpatigayon nga operasyon sang Criminal Investigation and Detection Group (CIDG) sa Purok Roxas, Barangay Concepcion, Koronadal City.
Sa interview sang Bombo Radyo Koronadal ginpahayag ni Barangay Kagawad Bobby Castillo, indi residente sang amo nga barangay ang napatay nga persona; duha ka bulan pa lang ini nga nagaistar sa amo nga lugar, nga ginpahayag nag-abot halin sa General Santos City.
Gin-engganyo man ni Castillo ang mga pumuluyo, *purok* presidents, kag iban pa nga mga opisyales nga gilayon nga i-report sa otoridad ang presensya sang wala mahibaluan ukon makaduluda nga mga indibidwal.
Ginhatagan niya sing importansya nga ang kooperasyon sang komunidad kinahanglanon para sa pagbantay sa mga bag-o nga pumuluyo kag pagtapna sang posible nga mga krimen.









