Target na sang Philippine Sports Commission (PSC) nga sugdan sa pagsulod sang tuig 2027 ang rehabilitasyon kag pagpaayo sang Rizal Memorial Football Stadium matapos ang kasugtanan sa tunga sang mga sports organization kag FIFA.
Nagsunod ini sa pagpirma sang Memorandum of Agreement (MOA) sang PSC, Philippine Football Federation (PFF) kag FIFA nga nagatuyo nga mapauswag pa ang football kag iban pa nga sports sa Pilipinas.
Lakip sa mga nagpirma sa kasugtanan amo si FIFA President Gianni Infantino, Executive Secretary Ralph Recto, PSC Chairman Patrick Gregorio kag PFF President John Gutierrez.
Base sa MOA, nagalaum ang FIFA nga maghatag sang $25 milyon ukon sobra P1.6 bilyon nga pondo para sa pagpauswag sang sports sa pungsod.
Sa sini nga kantidad, $13 milyon ukon masobra P831 milyon ang igahin para sa dako nga rehabilitasyon sang Rizal Memorial Football Stadium.
Ginklaro man nga wala sang pinansyal nga obligasyon ang gobyerno sa amo nga proyekto.
Suno kay Infantino, mangin importante nga sentro sang football ang stadium kag mangin dul-ong sang oportunidad para sa mga atleta halin sa nagkalain-lain nga pungsod nga magpakigbahin sa mga kompetisyon sa Pilipinas.
Paagi sa sini nga proyekto, ginapaabot nga mas mapauswag ang pasilidad sang sports sa pungsod kag mangin dugang nga ikapabugal sang mga Pilipino ang Rizal Memorial Stadium.








