Nagpahayag sang kahanda si House Deputy Speaker kag Iloilo Representative Janette Garin nga sabton sang Kamara ang mga pamangkot kag kritisismo may kaangtanan sa ginapahayag nga mga iregularidad sa ginaproponer nga ₱7.2 trilyon nga national budget para sa 2027.
Suno kay Garin, bukas ang Kongreso sa mga ginakabalak-an sang budget watchdogs, ilabi na sa mga alokasyon para sa imprastraktura, ayuda, serbisyo panglawas kag mga programa sa agrikultura.
Apang ginpanginwala niya nga may bastante nga basihan ang mga alegasyon nahanungod sa sobra ₱1 trilyon nga kantidad sang mga proyekto nga ginakwestiyon.
Ginpaathag man niya nga ginabusisi anay sang Department of Budget and Management kag sang ehekutibo nga sanga sang gobyerno ang mga ginaproponer nga proyekto antes ini ginapasa sa Kamara.
Dugang pa ni Garin, mahimo man magbag-o ang prayoridad sa paggamit sang pondo bangod sa mga kalamidad kag emerhensya nga nagakinahanglan sang gilayon nga paghatag sang pondo.
Samtang, natalana nga talakayon sa Senado sa Nobyembre 27 ang House Bill No. 10858 ukon ang ginaproponer nga 2027 General Appropriations Bill bilang kabahin sang pagbusisi sa panukala nga national budget.













