-- ADVERTISEMENT --

Nagbukas si CARMELLE sang bag-o nga oportunidad para sa Original Pilipino Music (OPM) matapos makuha ang kampeonato sa pinakauna nga Eurovision Song Contest Asia.

Paagi sa iya nga kanta nga “Sobra-Sobra,” nakakuha ang Filipina singer sang kabug-usan nga 211 puntos halin sa jury kag audience voting sa kompetisyon nga ginhiwat sa Bangkok, Thailand.

Nangin una si CARMELLE sa jury voting nga may 93 puntos kag nakakuha man sang 118 puntos halin sa mga tumalan-aw.

Nagsunod sa ikaduha nga puwesto ang Thailand nga ginarepresentar sang MANG x DAOU nga may 170 puntos, samtang nag-ikatatlo ang Vietnam paagi kay Tóc Tiên nga nakakuha sang 164 puntos.

Para kay CARMELLE, indi lamang personal nga kadalag-an ang iya pagkadaog kundi isa man ini ka oportunidad agud mas makilala sa international music scene ang mga kanta nga ginhimo sang mga Pilipino.

Nagalaum man siya nga mas madamo nga taga-iban nga pungsod ang maengganyo nga magpamati kag magdiskubre sang OPM.

Paagi sa iya nga kadalag-an, nabuksan ang dugang nga oportunidad para sa musikang Pilipino nga makilala sa mas malapad nga entablado sa Asya kag sa iban pa nga bahin sang kalibutan.