Padayon nga ginamonitor sang PDEA Region 12 si Mheco Abela Caday, SK chairman sang Barangay Topland, Koronadal City, matapos boluntaryo nga magpalapit ukon magsungaka sa Koronadal City Police Station sang Oktubre 21, 2026.
Suno sa police report, pila na ka bulan nga ginamonitor si Caday bangod sa ginatudlo nga kaangtanan sa ilegal nga droga, kag may ginaplano kuntani nga anti-drug operation batok sa iya.
Dugang ni PDEA 12 Assistant Regional Director Asnawi Salik, nalakip si Caday sa watch list sang ahensya halin Agosto kag padayon nga ginavalidate ang impormasyon, lakip ang mga laragway kag video nga nagalapta sa social media.
Gin-athag sang pamilya nga nagpalapit lamang siya sa pulis agud limpyuhan ang iya pangalan kag mangayo sang proteksyon. Ginapanginwala man nila nga drug user ukon pusher siya kag ginpahayag nga nag-negatibo sa drug test.
Nagaplano ang pamilya nga magkuha sang abogado kag magpasaka reklamo batok sa PNP, lakip ang pagpangusisa sa pagpagwa sang mugshot ni Caday.
Samtang, mahimo maghatag sang intervention ang LGU sang Koronadal kon mapamatud-an sang City Health Office nga nagakinahanglan siya sang bulig may kaangtanan sa paggamit sang ilegal nga droga.
