Nangin emosyonal si Senator-Judge Pia Cayetano matapos niya kuwestyunon ang pamaagi sang prosekusyon sa pagpangusisa tuhoy sa masobra ₱256,000 nga gin-gasto sa pagbakal sang sapatos para sa mga pamatan-on nga atleta.
Natabo ini sa cross-examination kay defense witness Chadrin Parian, amay sang isa ka miyembro sang basketball team nga Elite Philippines, nga ginalakipan sang anak ni Atty. Manases Carpio.
Ginatutukan sa pagpangusisa ang pagbakal sang sapatos sa Nike store sa Kuala Lumpur, Malaysia, nga suno sa alegasyon ginbayaran paagi sa credit card ni Carpio kag nagabalor sang ₱256,882.50.
Ginpahayag ni Cayetano nga bilang isa man ka iloy nga nagasuporta sa mga atleta, mahimo makapaluya sang buot sa iban nga ginikanan ang amo nga klase sang pagpangusisa, nga nagahatag sang mensahe nga indi na dapat maggasto para sa kaayuhan sang mga pamatan-on nga nagahandum mangin atleta.
Nagpangayo man sang pasaylo ang senador bangud nangin emosyonal siya, kag ginpahanumdom nga may kahilwayan ang mga senador sa pagpili sang ila ipamangkot kag kon san-o ini untaton.
Magadayon ang impeachment proceedings sa pag-usisa sang mga gasto kag transaksyon nga may kaangtanan sa pamilya ni Vice President Sara Duterte.
