Ginahimo sang lider sang VRAJA Ppop group nga inspirasyon ang mga kritisismo kag negatibo nga komento nga ila nabaton halin sa publiko agud mas mapaayo pa ang performance sang grupo.
Sa interview sang Bombo Radyo Koronadal kay JB Cadiente, ginpahayag sini nga ginakabig nila nga constructive criticism ang mga bashing nga ila nabaton, bangud paagi sini makita nila ang mga aspeto sang ila performance nga kinahanglan pa pauswagon.
Suno kay Cadiente, kabahin na sang industriya sang musika ang pagbaton sang nagkalain-lain nga opinyon kag kritisismo halin sa audience.
Gani, importante nga may mabakod nga panghunahuna kag bukas nga paghangop sa mga komento sang publiko.
Bisan pa sini, ginpasalamatan gihapon sang lider ang tanan nila nga supporters nga padayon nga nagasuporta sa ila grupo.
Ginpapromisa man niya nga magapadayon sila sa pagtuon, paghanas kag pagpauswag sang ila abilidad agud makahatag sang mas maayo nga performance kag mas mapalig-on pa ang ila grupo sa P-pop industry.
