Kinahanglan sang husto kag hugot nga pag-budget ang P96 nga kantidad agud masarangan ang pang-adlaw-adlaw nga panginahanglan sang isa ka indibidwal.
Ini ang ginpahayag ni Alex Pallon, isa ka traffic enforcer, sa interview sang Bombo Radyo Koronadal.
Suno kay Pallon, mahimo nga bastante ang P96 para sa pagkaon sa sulod sang isa ka adlaw, apang indi pa sini masakop ang iban pa nga kinahanglanon kasubong sang pamasahe kag personal nga gastuhon.
Dugang pa niya, bangud sa padayon nga pagsaka sang presyo sang mga balaklon, panguna nga kinahanglanon kag petrolyo, nagakinahanglan sang mas hugot nga pagbudget sa limitado nga kita agud masarangan ang adlaw-adlaw nga gastuhon.
Bangud sini, ginpahayag ni Pallon nga kinahanglan maghimo sang mga sakripisyo kag mangin maampingon sa pag-budget ang mga ordinaryo nga pumuluyo agud maigo ang ila kwarta sa pagkaon kag iban pa nga kinahanglanon.
