Nagpabutyag sang pagkadismaya ang isa ka traysikol driver sa syudad sang Koronadal sa ginpagwa nga poverty benchmark sang Philippine Statistics Authority (PSA) nga nagapatuhoy sa P96 nga kinahanglanon kada tawo kada adlaw agud indi makabig nga imol.
Sa interview sang Bombo Radyo Koronadal, ginpahayag ni Roel Alisna, isa ka traysikol driver, nga indi bastante ang amo nga kantidad sa pag-atubang sang nagasaka nga presyo sang mga baraklon kag iban pa nga panguna nga kinahanglanon.
Suno kay Alisna, bisan ang iya kita nga nagaabot sa P400 kada adlaw indi gihapon masarangan nga masuportahan ang tanan nga kinahanglanon sang iya pamilya, ilabi na kun may mga kabataan nga naga-eskwela.
Dugang pa niya, mabudlay na para sa ordinaryo nga mga mamumugon ang pag-budget sang ila kita bangud sa kamahal sang pagkaon, mga panguna nga produkto kag padayon nga pagsaka sang presyo sang petrolyo.
Bangud sini, nagpanawagan siya sa nasyonal nga gobyerno nga hatagan sang dugang nga atensyon ang aktuwal nga kahimtangan sang mga ordinaryo nga Pilipino kag usisaon kon nagakaigo bala ang ginapatuman nga poverty benchmark sa ila adlaw-adlaw nga panginahanglan.
Ginpahayag man niya nga importante nga ikonsiderar ang nagkalain-lain nga gastuhon sang tagsa ka pamilya agud mas masaligan nga matakos ang ila kahimtangan sa tunga sang nagamahal nga presyo sang mga balaklon.
