Ginapanindugan sang kampo ni Sen. Ronald “Bato” Dela Rosa nga indi pagtago ang rason sang iya padayon nga indi pagpakita sa publiko kundi pagpanalipod lamang sa iya mga legal nga kinamatarong.
Ini ang ginpahayag sang iya abogado nga si Atty. Israelito Torreon sa isa ka exclusive interview, kun sa diin ginpaathag niya ang panindugan sang senador sa tunga sang mga panawagan nga mag-atubang ini sa mga alegasyon batok sa iya.
Samtang, ginakuwestiyon man ni Torreon ang P50 milyones nga pabuya nga ginbutang para sa pagkadakop sang senador, pati na ang pagklasipikar sa iya bilang “armed and dangerous.”
Suno sa abogado, mahimo ini nga maghatag sang impresyon nga may yara sang “shoot-to-kill order” batok sa iya kliyente, gani iya ginpabutyag ang pagkabalaka sa seguridad kag mga kinamatarong ni Dela Rosa.
Ginhangkat man ni Torreon ang mga nagatinguha nga panagutin ang senador nga idangat ang kaso sa lokal nga korte agud mapatuman ang nagakaigo nga proseso sang hustisya. Suno sa iya, nagapadayon ang justice system sa Pilipinas.
Apisar nagligad na ang ultimatum nga ginhatag sang Philippine National Police ukon PNP kag may yara na sang pabuya para sa pagkadakop sang senador, wala pa gihapon ini nadakpan tubtob sa subong.
Nahibaluan nga ginngalanan si Dela Rosa bilang isa sa mga co-perpetrator ni anay Presidente Rodrigo Duterte sa kaso nga crimes against humanity sa International Criminal Court. May kaangtanan ini sa implementasyon sang kampanya kontra droga sang nagligad nga administrasyon.
Padayon naman nga ginahulat ang masunod nga mga tikang sang mga otoridad sa sini nga kaso, lakip ang panindugan sang kampo sang senador tuhoy sa mga alegasyon kag mga panawagan nga mag-atubang ini sa hustisya.
