Nagpabutyag sang pagkadismaya ang isa ka manuglimpyo sang mga pantyon sa Catholic Cemetery sa Koronadal bangud sa pagnubo sang ila kinitaan sini nga tuig.
Sa interview sang Bombo Radyo Koronadal kay Gemalyn Sampiano, isa ka manuglimpyo sang pantyon, ginpahayag sini nga nagalab-ot na lamang sa P25 ang ila kinitaan sa una nga kustomer ukon buena mano, samtang naga-range lamang sa P300 tubtob P1,000 ang ila adlaw-adlaw nga kita.
Malayo ini sa ila kinitaan sang nagligad nga tuig nga nagalab-ot pa sa P2,000 tubtob P3,000 kada adlaw.
Suno kay Sampiano, nahibaluan man nila sang iya bana ang kabudlayan sa pangabuhi kag krisis nga ginaatubang sang madamo nga pamilya subong, nga posible nga nakaapekto man sa ila kinitaan.
Bangud sini, nagapanawagan si Sampiano sa publiko nga magbisita sa mga minatay nga himata kag magkuha sang ila serbisyo sa paglimpyo sang mga pantyon agud makabulig sa ila pang-adlaw-adlaw nga kinahanglanon.
Dugang pa niya, daku nga bulig ang bisan ano nga kita nga ila mabaton agud may magamit sa ila panimalay kag may mahatag sa kinahanglanon sang ila mga kabataan, ilabi na sa pag-eskwela.
