Padayon ang monitoring kag assessment sang Barangay Morales sa mga lugar nga naapektuhan sang pagbaha bangud sa mabaskog nga pagbunok sang ulan.
Sa interview sang Bombo Radyo Koronadal kay Kagawad Hans Avance, ginpahayag sini nga masobra 20 na ka indibidwal ang apektado sang baha nga nag-abot tubtob sa hawak nga kadalumon.
Lakip sa mga apektado nga lugar ang Purok Masagana B, Alegria, Tolentino kag Boundary.
Gilayon naman nga gin-rescue ang mga apektado nga residente kag gindala sa evacuation center agud masiguro ang ila kaluwasan.
Nagpatigayon man sang disinfection ang mga rescuers sa mga indibidwal nga naglusong sa baha agud malikawan ang posible nga impeksyon kag balatian.
Samtang, bilang long-term nga solusyon sa nagabalik-balik nga pagbaha, naghimo na sang resolusyon ang Barangay Morales agud ipanawagan ang pagpadako sang dam nga ginalantaw nga makabulig sa pag-atubang sang problema sa pagbaha.
Sa pihak sini, gin-awhag ni Kagawad Avance ang mga pumuluyo nga apektado nga maghalong kag magkooperar sa mga otoridad.
Ginpasiguro man niya nga handa ang barangay nga maghatag sang gilayon nga assistance kag rescue operation sa mga residente nga nagakinahanglan sang bulig.
