Nagdangat na sa masobra 5,000 ang napatay bangud sa nagapadayon nga Ebola outbreak sa Democratic Republic of Congo (DRC), suno sa datos nga ginpagwa sang gobyerno.
Base sa report, masobra 10,000 na ka tawo ang natakdan sang virus halin pa sang Mayo.
Walo sa 26 ka probinsya sa nasambit nga pungsod ang naapektuhan sang outbreak, lakip ang mga kaso sang pagkapatay sa gwa sang mga treatment center.
Mas ginakabalak-an pa ang sitwasyon bangud wala pa sang aprubado nga espesipiko nga bulong ukon bakuna batok sa Bundibugyo virus disease (BVD), nga ginhalinan sang presente nga outbreak.
Ginalantaw ang sini nga Ebola outbreak bilang ikaduha nga pinakamadako sa maragtas sang kalibutan, kasunod sang outbreak sang 2014 tubtob 2016 sa Guinea, Liberia kag Sierra Leone, nga nakapagkit sang halos 28,600 ka kaso kag kapin 11,000 nga napatay.
Samtang, nagadugang man ang mga pungsod sa Africa nga nakarekord sang kaso sang Ebola.
Lakip diri ang Nigeria, nga amo ang ikaapat nga African country nga nagreport sang kaso, kaupod ang Kenya kag Uganda.
Padayon naman nga ginabantayan sang mga awtoridad ang paglapta sang virus samtang ginapabakod ang mga tikang agud mapunggan ang dugang nga impeksyon kag pagkapatay sa mga apektado nga komunidad.
