Patay ang ginakilala sang militar nga Head sang Regional Instructors Bureau sang Communist Terrorist Group (CTG) nga New People’s Army (NPA) matapos ang ginpatigayon nga law enforcement operation sang sang militar kag kapulisan sa Barangay Silway 8, Polomolok, South Cotabato.
Ginkilala ang napatay nga si Noel Pamaong, nga kilala man sa mga alyas nga “Lauro” kag “Santi.”
Suno sa impormasyon, may yara ini sang Warrant of Arrest nga ginpagwa sang Regional Trial Court Branch 26, 11th Judicial Region sa Surallah, South Cotabato, sang Hulyo 6, 2023, may kaangtanan sa kaso nga Multiple Attempted Homicide sa idalom sang Criminal Case No. 3310-2023-LS, nga may rekomendado nga piyansa nga 120 mil pesos.
Gintigayon ang operasyon sang mga elemento sang 1st Mechanized Brigade kag 603rd Infantry Brigade, sa pagbuligay sang mga operatiba sang South Cotabato Provincial Police Office.
Sa amo nga operasyon, narekober sang mga otoridad ang isa ka kalibre .45 nga pistola kag isa ka hand grenade.
Sa pihak sini, ginpabug-atan ni 6th Infantry Division kag Joint Task Force Central Commander Brigadier General Edgar L. Catu ang importansya sang koordinasyon sa tunga sang militar kag kapulisan sa pagpatuman sang mga operasyon para sa seguridad sang publiko.
Gin-apresyar man sini ang suporta kag kooperasyon sang mga pumuluyo sa pagbulig sa mga otoridad agud matalupangdan kag mapunggan ang posible nga mga hulga sa seguridad.
Samtang, ginpahayag sang 6ID nga padayon ang ila pagpakig-angut sa Philippine National Police, iban pa nga ahensya sang gobyerno kag lokal nga mga komunidad agud mapalig-on ang paghari sang layi kag mapabilin ang kalinong kag seguridad sa Central kag South Central Mindanao.
