Ibinunyag ng dating aide ni dating Department of Public Works and Highways (DPWH) Undersecretary Roberto Bernardo na inatasan siyang maghatid ng mga maleta at kahon na hindi niya alam ang laman sa ilang matataas na opisyal ng pamahalaan.
Sa pagdinig ng Sandiganbayan Fifth Division kaugnay ng petisyon sa piyansa ni Senador Jinggoy Estrada sa kasong plunder na may kaugnayan sa umano’y P573 milyong kickback mula sa mga flood control project, tumestigo si Vergel Nino Garcia tungkol sa mga naturang paghahatid.
Ayon kay Garcia, inutusan siya ni Bernardo na maghatid ng 12 kahon kay Estrada sa Artiaga Building sa San Juan City noong Nobyembre 2024. Kasama niya ang driver na si Francisco dela Fuente, ngunit hindi nila sinuri ang laman ng mga kahon at wala rin silang nakuhang larawan o video bilang dokumentasyon.
Ibinanggit din sa testimonya ang paghahatid ng mga kahon at maleta kina dating Senador Bong Revilla, dating DPWH Secretary Manuel Bonoan, dating DPWH Undersecretary Maria Catalina Cabral at dating Education Undersecretary Trygve Olaivar.
Samantala, nagtestigo rin si dating DPWH-NCR Director Gerard Opulencia tungkol sa umano’y 5 hanggang 8 porsiyentong kickback na tinatawag na “pasasalamat” para sa ilang opisyal, bukod pa sa 25 porsiyentong “commitment fee.”
Nakatakdang ipagpatuloy ang pagdinig sa kaso sa Nobyembre 4.
