Indi na lang mga balay, salakyan ukon bulawan ang ginabakal sang mga milyonaryo.
Subong, bisan ang mga tul-an sang dinosaur nga minilyon na ka tuig ang edad, handa man nila nga baydan sang minilyon ka dolyar!
Isa ka fossil sang Nanotyrannus nga gin-angalanan nga “Jodi” ang nabaligya sa auction sang Sotheby’s sa New York sa nagakibot nga kantidad nga $47.3 milyon dolyar ukon ₱3.02 bilyon, matapos ang bidding nga nagdugay lamang sang 12 minutos.
Sa baylo nga maglab-ot lamang sa ginapaabot nga $9 milyon, daw nagdinalagan pa ang presyo sini nga mas dasig pa sa paglagas sang dinosaur sa iya biktima!
May kataason si Jodi nga 9.6 ka piye kag kalabaon nga 19.6 feet, nga may kabug-usan nga 191 ka fossilized bone elements.
Nadiskubrehan ini sang 2019 ni Jodi Pierson, isa ka rancher sa Montana sa iya pribado nga duta sa Hell Creek Formation.
Ang amo nga lugar kilala sa madamo nga fossil sang mga dinosaur.
Sa madugay nga panahon, ginadiskusyonan sang mga eksperto kon ang Nanotyrannus isa gid ka separado nga klase sang dinosaur ukon bata pa lamang nga Tyrannosaurus rex.
Apang, ang mga pagtuon nga ginpatigayon sang 2025 nagsuporta sa pagklasipikar sini bilang isa ka separado nga genus.
Sa pihak sang mataas nga presyo sang Jodi, may mga paleontologist nga nagpahayag sang kabalaka sa pagbaligya sang importante nga mga fossil sa pribado nga mga kolektor.
Suno sa ila, mahimo nga mangin limitado ang pag-access sang mga siyentista kag publiko sa amo nga mga ispesimen para sa pagtuon kag edukasyon.
