Ginkuwestiyon sang abogado ni Sen. Ronald “Bato” Dela Rosa ang tikang sang gobyerno nga magtanyag sang ₱50 milyones nga pabuya para sa pagdakop sa senador.
Ginkontra man niya ang pahayag sang kolumnista nga si Mon Tulfo nga nagakabagay lamang ang amo nga pabuya kay Dela Rosa.
Sa isa ka post sa social media, ginpahayag ni Atty. Israelito Torreon nga ang pagtanyag sang pabuya para sa pagdakop kay Dela Rosa mahimo mag-aghat sa mga tawo nga magpatuman sang ila kaugalingon nga hustisya sa baylo nga magsunod sa balaod.
Ginsabat man ni Torreon ang pahayag ni Tulfo nga daw nagapangayo sang kaluoy ang iya kliyente. Suno sa abogado, wala sila nagapangayo sang kaluoy ukon espesyal nga pagtratar, kundi nagapangabay lamang nga magpakita ang gobyerno sang warrant of arrest nga gin-isyu sang korte sa Pilipinas.
“Indi ini pagpangayo sang kaluoy. Isa ini ka pagpamilit nga sundon sang gobyerno ang balaod,” suno kay Torreon.
Gindugang sang abogado nga dapat matagamtaman man ni Dela Rosa ang proteksiyon sang Konstitusyon, pareho sang iban nga mga Pilipino, bisan ano pa ang mga alegasyon batok sa iya.
Ginpapahayag man ni Torreon nga kon sala ang pagdakop sa isa ka tawo nga wala sang warrant, sala man suno sa iya ang pagpangita kag paglagas sa isa ka tawo nga wala sang warrant nga gin-isyu sang korte sa Pilipinas.
Suno sa abogado, indi dapat gamiton ang pagsunod sa balaod bilang armas batok lamang sa mga tawo nga indi nahamut-an ukon wala ginauyonan sang gobyerno.
