Nagapati si South Cotabato Vice Governor Arthur Pingoy Jr. nga may gahum ang national government nga maghimo sang nagakaigo nga mga tikang agud mapunggan ang padayon nga kaperdihan sang lokal nga mga magbababoy sa pungsod.
Sa interview sang Bombo Radyo Koronadal, ginpahayag nga 80 tubtob 90 porsyento sang suplay sang baboy ang nagahalin sa mga backyard hog raisers, samtang 10 tubtob 20 porsyento naman ang halin sa mga pribado nga kumpanya kag dalagku nga magbababoy.
Suno kay Pingoy, dapat maghimo sang tikang ang Department of Agriculture agud mahagan-hagan ang epekto sang pagnubo sang presyo sang buhi nga baboy, lakip na ang pag-konsiderar sa pagpauntat sang importasyon sang baboy sa pungsod.
Ginapatihan nga ang paglimit sang importasyon mahimo makabulig sa pagpanalipod sang lokal nga industriya kag sa pangabuhian sang mga backyard hog raisers nga nagasalig sa pagbaligya sang baboy.
Gani, ginapanawagan ang national government nga mangin aktibo sa pagpangita sang solusyon agud mabuligan ang lokal nga mga magbababoy kag mapalig-on ang industriya sang pag-aalaga sang baboy sa pungsod.
