Nagapreparar ang Department of Social Welfare and Development (DSWD)-12 sang mga programa nga nagatuyo nga buligan ang mga mangunguma sa pag-atubang sang posible nga epekto sang El Niño kag pagbag-o sang klima.
Sa interview sang Bombo Radyo Koronadal, ginpahayag ni Regional Director Loreto Cabaya Jr., nga lakip sa mga inisyatibo ang paghimo sang water impounding systems kag fishponds nga mahimo mangin suplay sang tubig sa pagpanguma kag dugang nga pagkakakitaan paagi sa pag-atipan sang tilapia.
Lakip man sa programa ang cash-for-work ukon food-for-work, climate change training kag pag-angot sang produkto sang mga mangunguma sa merkado.
Nagahatag man ang ahensya sang disaster response assistance, filtration kits para sa komunidad nga kulang sa matinlo nga tubig, kag teknikal nga bulig sa mga lokal nga pangulohan.
Gin-agda ni Cabaya ang mga mangunguma kag LGUs nga mag-umpisa na sa pagpangpreparar samtang may ulan pa, lakip ang pagtipig sang tubig sa mga tanke, drum kag iban pa nga sudlanan.
Gin-awhag man niya ang mga LGU nga magpakig-angot sa DSWD-12 para sa giya kag suporta sa pagpatuman sang mga proyekto batok sa epekto sang El Niño.
