Nagapanawagan ang balut vendor nga si Maymay Chavez sa City Government of Koronadal nga tugutan sila nga makabalik sa ila anay nga pwesto sa crossing bo. 2 sang syudad, matapos maghinay ang ila bentahanay sa bag-o nga lokasyon nga ila gin balhinan.
Sa interview sang Bombo Radyo Koronadal, ginpahayag ni Chavez, nga 20 na ka tuig nga nagabaligya sang balut, daku ang epekto sang pagbalhin sa iya pang-adlaw-adlaw nga kita.
Halin sa mas madamo nga nagapamakal sa may stoplight sang crossing, nagnubo ang iya baligya sa bag-o nga pwesto, nga nagalab-ot na lamang sa mas manubo sa P100.
Ginpahayag niya nga nagasunod na lamang sila sa desisyon sang lokal nga panguluhan, apang nagalaum gihapon nga konsiderahon ang ila pangabay nga makabalik sa anay nga lokasyon agud makabawi sa ila kinitaan.
Balut lamang ang panguna nga ginasaligan ni Chavez nga pangabuhi sa sulod sang duha ka dekada. Samtang, gin-agda niya ang iya mga suki nga magkadto sa ila bag-o nga pwesto malapit sa isa Drug Store ukon Pharmacy agud padayon nga masuportahan ang ila pangabuhi.
