Nagapabakod ang Department of Agriculture (DA) sang mga tikang agud maproteheran ang lokal nga industriya sang bugas batok sa iligal nga pagpasulod sang mga produkto sa Pilipinas.
Ini matapos nga ginpahunong sang Agriculture Secretary Francisco Tiu Laurel Jr. ang pagpasulod sang 12,480 metric tons nga bugas halin sa Vietnam nga sakay sang barko nga MV Tay Son 2, bangud sa mga pagkadiskubre sang indi pag-angot sa mga dokumento sang kargamento. Suno sa DA, ginapaabot nga magaabot ang kargamento sang Hulyo, apang nakalab-ot lamang ini sa Pilipinas sang Setyembre 14.
May yara man sang diperensiya sa deklarasyon sang porsiyento sang nabuka nga bugas sa mga dokumento kag sa aktuwal nga kargamento. Bangud sini, ginmanduan ni Laurel ang Bureau of Plant Industry nga kanselahon ang import permit agud mapunggan ang posible nga paglapas sa mga regulasyon sa importasyon.
Samtang, ginpahayag sang kalihim nga handa siya nga magpasaka sang kaso batok sa mga nagapalapta sang disinformasyon nga nagadalahig sa iya sa kontrobersiya. Ginpabutyag man niya nga ang iya mga tikang ginahimo para sa pagpanalipod sa mga mangunguma kag sa lokal nga sektor sang agrikultura.
Sa pihak sang kontrobersiya, nagapabilin ang panawagan para sa dugang nga imbestigasyon sang Senado bahin sa ginapatihan nga P700 milyones nga pagsulay sa pagpasulod sang bugas halin sa Vietnam.
