Nagpabutyag sang simpatiya ang isa ka pork vendor sa Koronadal City sa mabudlay nga kahimtangan nga ginapangatubang sang mga lokal nga hog raisers bangud sa padayon nga pagnubo sang presyo sang buhi nga baboy, samtang nagapadayon ang pagsaka sang gasto sa pag-atipan sang ila mga alagahon.
Sa interview sang Bombo Radyo Koronadal kay Maribeth Sereno, isa ka pork vendor, iya ginpahayag nga mabudlay ang kasamtangan nga sitwasyon bangud indi na balanse ang presyo sang buhi nga baboy kag ang nagakinahanglan nga gasto sa pagpadako sini.
Suno kay Sereno, yara sa P105 tubtob P110 kada kilo ang presyo sang buhi nga baboy sa kasamtangan, samtang nagalab-ot na sa sobra P2,000 ang presyo sang isa ka bag sang feeds nga ginapakaon sa mga baboy.
Bangud sini, ginpahayag niya ang iya kabalaka sa nagapadayon nga kabudlayan sang mga hog raisers nga kinahanglan maggasto para sa pagkaon kag pag-atipan sang ila mga alagahon bisan manubo ang presyo sang ila ginabaligya nga mga baboy.
Kaangot sini, nagpalab-ot sang panawagan si Sereno sa gobyerno, ilabi na kay South Cotabato Governor Reynaldo Tamayo Jr., nga maghatag sang bulig kag maghimo sang nagakaigo nga aksyon agud masabat ang problema sang mga lokal nga hog raisers.
Gin-apela man niya nga talupangdon ang panawagan sang mga magbababoy nga ipasaka ang floor price sang buhi nga baboy agud makabulig sa ila nga mabawi ang nagasto sa produksyon kag mapadayon ang ila pangabuhian. Ginpahayag ni Sereno nga importante ang tikang sang gobyerno agud mabuligan ang mga hog raisers sa pag-atubang sang krisis sa presyo kag malikawan nga magpadayon ang ila kaperdihan.
