Ginapangabay sang mga tagausig sang International Criminal Court (ICC) nga batunon bilang ebidensya ang nauna na nga nairekord nga mga pahayag sang tatlo pa ka saksi nga ginapatihan may importante nga impormasyon tuhoy sa Oplan Tokhang kag mga extrajudicial killing sa panahon sang pagkapresidente ni anay Presidente Rodrigo Duterte.
Sa 11 ka pahina nga aplikasyon nga ginpasaka sang Oktubre 12 kag ginpagwa sang Martes, ginpahayag sang prosekusyon sa Trial Chamber III nga ang tatlo ka saksi nga ginakilala sa mga code nga “P-0024,” “P-1357,” kag “P-1359” may mga ebidensya nga nagasuporta kag nagadugang sa mga nauna nga testimonya kag ebidensya sang iban nga mga saksi.
Sa baylo nga mag-atubang personal sa korte, ginapangabay sang mga tagausig nga gamiton na lamang bilang ebidensya ang ila nauna nga narecord nga mga testimonya.
Lakip sa importante nga mga pahayag nga luyag isumiter amo ang testimonya ni P-1359 tuhoy sa mga pagpatay nga may kaangtanan sa Oplan Tokhang nga ginpahayag nga natabo sa tunga sang 2016 kag 2018.
Ang Oplan Tokhang naghalin sa mga pulong nga “toktok” kag “hangyo,” nga nagatumod sa pagpanuktok sa mga balay kag pag-agda sa mga ginadudahan nga nalambigit sa droga nga magsurender. Kabahin ini sang kampanya kontra droga sang administrasyong Duterte nga gin-angot sa madamo nga kamatayon.
