Ginahatagan sang mas daku nga pagtalupangod ang pagpauswag sang abilidad sang mga estudyante sa journalism bilang kabahin sang nagapadayon nga selebrasyon sang Cooperative Month sa syudad sang Koronadal.
Sa interview sang Bombo Radyo Koronadal, ginpahayag ni Jonathan B. Enmanuel, City Cooperative Officer sang Koronadal, nga isa sa mga highlight sang ila month-long nga selebrasyon ang pagbisita ni Peabody Award-winning broadcast journalist kag UP Diliman Department of Journalism Chairperson Kara David.
Suno kay Enmanuel, kabahin ini sang ila mga inisyatibo agud mapabaskog ang journalism sa sulod sang mga eskwelahan kag mapalapnag ang ihibalo sang mga estudyante tuhoy sa nagkalain-lain nga pamaagi kag teknik sa pagbalita.
Dugang pa niya, lakip man sa mga aktibidad ang community extension nga ginpatigayon kaupod sang Yaman ng Kalusugan Program ukon YAKAP caravan sa Purok Lansang, Barangay San Roque, bilang kabahin sang ila pagpakigbahin sa komunidad.
Samtang, ginpaabot man ni Enmanuel ang iban pa nga aktibidad sa idalom sang Cooperative Month, lakip na ang Gawad Parangal nga nagatuyo sa paghatag sang pagkilala sa mga outstanding cooperatives.
Dugang pa, sa Oktubre 29, 2026, pagahiwaton ang Provincial Cooperative Summit sa South Cotabato Gymnasium and Cultural Center, nga mangin isa pa ka oportunidad sa pagpakigbahin sang mga kooperatiba sa probinsya.
Paagi sa sini nga mga aktibidad, ginapaabot nga mapalig-on pa ang papel sang mga kooperatiba indi lamang sa pagpauswag sang ekonomiya, kundi pati sa edukasyon kag pagserbisyo sa komunidad.
