Ginpakamalaot ni US President Donald Trump si Ukraine President Volodymyr Zelensky bangud sa padayon nga pag-atake sang Ukraine sa Russia, bisan pa sang ila ginpahayag nga panawagan nga untatan ang mga pag-atake.
Suno kay Trump, wala ginrespeto sang Ukraine ang ila pangabay nga untatan ang pag-atake sa Russia.
Lakip sa mga gin-report nga operasyon ang malapad nga paggamit sang mga drone nga nakaigo sa mga oil depot sang Russia.
Dugang pa ni Trump, indi niya luyag nga madula ang Russia sa proseso sang negosasyon para matapos ang giyera.
Para sa iya, importante nga magapadayon ang komunikasyon sang duha ka pungsod agud makakita sang paagi nga mauntat ang inaway.
Gin-insister man sang US President nga para sa iya, kulang ang ginahimo sang Ukraine agud mapadali ang pagtakop sang giyera.
Apang, komplikado gihapon ang sitwasyon bangud sang mga isyu bahin sa seguridad kag teritoryo.
Samtang, padayon nga ginapahayag ni Trump ang iya handom nga masugdan kag mapadayon ang negosasyon sa tunga sang Russia kag Ukraine agud makab-ot ang posible nga kasugtanan para sa kalinong.
