Ginbuyagyag sang singer kag aktres nga si Selena Gomez ang rason kon ngaa nagdesisyon siya nga untatan na ang paggamit sang vape.
Suno sa report, ang iya pirmi nga paggamit sang vape nga may mataas nga nicotine amo ang ginatudlo nga posible nga nakaapekto sa iya tingog.
Bangud sini, narealisar niya ang importansya sang pag-atipan sang iya panglawas, ilabi na kay ang iya tingog importante sa iya karera sa industriya sang musika kag entertainment.
Ginadmiter man niya nga indi mahapos ang pag-untat sa paggamit sang vape.
Ang nicotine isa ka substansya nga mahimo magresulta sa pagkaadik, gani mabudlay para sa iban nga untatan ini dayon.
Bangud sang iya eksperyensya, ginlaygayan ni Gomez ang iya mga fans, ilabi na ang mga pamatan-on, nga indi magsunod sa iya naandan anay nga bisyo.
Luyag niya nga mangin paandam ang iya eksperyensya sa iban agud malikawan nila ang posible nga malain nga epekto sang vape sa ila panglawas.
Sa karon, ginapabugal ni Gomez ang iya kaugalingon bangud nag-untat na siya sa paggamit sang vape.
Nagalaum man siya nga amat-amat nga magbalik sa normal ang iya tingog samtang padayon nga ginalikawan ang amo nga bisyo.
